السبت، ديسمبر 11، 2010

62 أيوه.. بحب البنات! (1-2)


أيوه.. بحب البنات!! (1-2)


جميعكم يعرف هذا المشهد.. إن لم يكن بالمشاركة، فبالمشاهدة!!

- إنت متجوز؟
- الحمد لله (!)
- عندك أولاد؟
- لله الحمد (!!) 
- كام؟
- اتنين (!!!) (بابتسامة من طراز: آه - بدأنا - الاستجواب)
- ولاد ولا بنات؟
- بنتين (!!!!) (بابتسامة من طراز: اللهم - طولك - يا - روح)
- معلش.. كل اللي يجيبو ربنا كويس! (بشفقة)
- معلش على إيه بالضبط (؟!!!!!)
- على العموم ما تقلقش.. (مشغولا بطأطأة رأسه في حسرة حقيقية!!)
- بس أنا مش قلقان من حاجة (!!!!!!) (مقاطعا بدهشة مغلولة أو غل مدهوش)
- صدقني بكرة تخاويهم إن شاء الله.. (بإصرار غريب!)
- .............(!!!!!!!)

pause

حتى هذه اللحظة قد تتشابه الحوارات إلى حد كبير.. لكن أحسب أن الجزء التالي من الحوار قد تختلف فيه ردود الأفعال؛ فنصفنا يكتفي بالابتسام أو الإيماء برأسه حرجا، والنصف الثاني قد يشكر محاوره على شعوره العميق وإحساسه البالغ بمعاناته لعدم إنجاب أولادٍ ذكور؛ حيث أنه بالفعل يشعر بهذه المعاناة..!
لكنني - حقيقة - أنتمي إلى النصف الثالث (!!)؛ إذ يكون رد فعلي - عندما أكون هادئا طبعا - كالتالي:

play

- مين قلك إن أنا عاوز أخاويهم؟!
- بس يا راجل.. ما تقولش كده! (بعتاب مندهش)
- حقيقي أنا مش عاوز أخاويهم..!
- استغفر ربك بسرعة! (برعب)
- أستغفر الله العظيم في كل وقت وحين.. لكن إيه علاقة ده بأني مش عاوز أخاويهم؟!
- ما هو مش معقول فيه حد مش عاوز ولاد!! [يقصد ذكورا طبعا]
- صدقني.. أنا الحدّ ده!
- طيب ليه؟!!!
- دي حاجة تخصني!! (بابتسامة من طراز: وإياك - تسألني - الأسئلة - دي - تاني)

stop

هنا يكون قد وصل إلى الحد غير المسموح له بتجاوزه.. وإنما كان الدافع الوحيد لاستمراري في الحديث هو أن أبرز له وأؤكد على رفضي لشفقته غير المبررة، والتي أصبحت من مسلمات مجتمعنا...
أنا أقبل وأتفهم إحساس الناس بالشفقة على من لم ينجب (مع رفضي للإعراب عنها بمناسبة وغير مناسبة لصاحب الشأن).. لكن لا أقبل ولا أتفهم أبدا الإحساس بالشفقة على من من لم ينجب إلا البنات!!!!!
الأغرب أن الكثير من نساء مجتمعنا ذاتهن لهن نفس هذه النظرة العجيبة...!



خذ عندك مثلا جدتي لوالدتي.. فهي - إن كنت لا تعرف - ممن لديهم قناعة واضحة أن جنس البنات ليس له فائدة ترجى في هذا العالم؛ ولولا أنهن من يملكن الأرحام ويلدن الذكور يوما ما لكانت صدَّقَت على أول مشروع يُطرح بإعادة وأد البنات!!!!
ما أن تراني أو تهاتفني حتى تلقي عليّ سؤالها الأزلي بكل حسرة:
- مش هشوفلك ولاد قبل ما أموت؟!!
- بعد الشر عليكي يا تيتة!
- طيب ما بتسمعش الكلام لي؟!
- آسف يا تيتة.. عندك حق.. أنا خلاص قررت إني أجيب ولد.. اصبري عليّ شوية والأجازة الجاية هيكون معايا (!!!!!!)
- طب بذمتك مش زعلان إن ماعندكش ولاد؟
- طبعا يا تيتة.. دا انا حتى بمشي في الشارع مطأطأ راسي وباصص في الأرض عشان ماعنديش غير بنات (!!!)

تقريبا يدور الحوار بهذه الطريقة كل مرة!!!!
ولا يسألني أحدكم السؤال الذكي: هي تيتة دي مش ست برضه؟!!
كما لا يسألني أحكم بمكر: أمال فين الأسد اللي كان بيكلم الراجل الغلبان اللي فوق؟!!
يبدو أنكم لا تفهمون.. (دي تيتة يا جماعة... تبقى مصيبة لو قلت في وشها اللي هقوله لكم دلوقتي!! لأنه لو حصل هتمرض فيها، طبعا بعد ما تحرمني من الميراث!!!)..

أقولها بأعلى صوتي: (والله العظيم أنا مش عاوز ولاد.. لأني فعلا بحب البنات بس!!!!)
تتساءلون مثل صاحبنا:
- طيب ليييييه؟!!
- إن شاء الله لما أعرفكم على بناتي هتعرفوا ليه...

لكن للحديث بقية....

هناك 62 تعليقًا:

ليلى الصباحى.. lolocat يقول...

السلام عليكم
انا كمان بخب البنات
بس بحب رزق الله كيف شاء
احمد الله اخى ان الله رزقك نعمة الانجاب من الاساس .... هناك من يتمناها صبره الله واعانه على بلواه

لا اقول لك الا قول الله عز وجل

(يَهَبُ لِمَنْ يَشَاء إِنَاثًا وَيَهَبُ لِمَن يَشَاء الذُّكُورَ (49) أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَن يَشَاء عَقِيمًا إِنَّهُ عَلِيمٌ قَدِيرٌ (50) الشورى)

ياريت اعرف فين طريق تيته بتاعتك وانا اروح اقنعها ههههه ربنا يبارك لك فى عمرها

تحياتى لك ولبناتك وام بناتك

البنفسج الحزين يقول...

ههههههه ...أحييك بشده
وعلي رأي سعاد حسني
البنات البنات ألطف الكائنات ...
ربنا يباركلك في بناتك ...
ويجعل لك دايما فيهم قرة أعين...

ويخاويهوملك
ههههههههه

موناليزا يقول...

ربنا يخليهوملك ويبارك لك فيهم
وحقيقى بحييك جدا على تفكيرك وبحييك اكتر على اسلوبك مع جدتك:)

أنا عن نفسى بحب الاطفال كلهم وعايزة ابقى أم وبس ومش مهم النوع:)
------------
ملحوظة: لم يصلنى شئ عبر الايميل
وبرجاء لو امكن ارسال الاجابة على حسابى على الفيس بوك أو على المدونة ولكم منى خالص الشكر

خواطر شابة يقول...

انا معك في كل كلامك وثثيرني في مجتمعي هذه النظرة التي تحدثث عنها ففي مسقط رأسي عندما يولد ذكر يعلنون عن الفرحة بالزغاريد لكن عندما تزداد الانثى من العادة والمتعارف عليه ان لا تكون هناك زغاريد ايضا التهنئة بالذكر تكون مفعمة بالفرحة والاكبار والاعزاز لكن التهنئة بالانثى تكون مرفوقة بالدعوة ان يكون مولودك القادم ذكر
تعرف تدوينتك اليوم أثارت قي شجون كثيرة
دمت بكل ود

زينب علي حبيب يقول...

الاطفال كلهم نعمة من ربنا

متشوقة على الجزء الثاني :)

ستيتة يقول...

يتعجب الكثير من بني البشر كيف ان المرأة هي أكبر مضطهد لجنسها
هي التي تطالب بشده بالذكور

تعالى نحلل كلام تيتة ربنا يخليها ويبارك لها في صحتها وعمرها
الستات في الأجيال دي وما قبلها شافوا اللي الست فعلا بتشوفه :)
شافوا اللي خلى الحلة البرستو في أجيالنا تنفجر
وده مش لازم لها بشكل شخصي
كرهوا البنات لأنهن عاوزين ضهر يكبر امام الزوج فيتراجع جبروته
ويكونوا لها عزوة مادية - مع ان ده كان زمان بس
وفي نفس الوقت تؤمن مكانتها عند زوجها حتى لا ينشد الذكور عند أخرى

شوية شوية فضلت نظريتهم واحدة
مع تغير الزمن
والأسباب التي دعتهم للنظرية
والتعليم
ووووووو
فضلت النظرية المفترية العنصرية
ولو سألتهم عن السبب مش ها يعرفوا يفتكروا ليه اساسا آمنوا بهذا النهج

ربنا يخلي البنات
اللي عبارة عن ورد بلون وريحة في البيت
واللي بيخدموا الأم والأب في الكبر حتى لو مع عشرين ولد
واللي صدقا وحقا حبايب ابوهم

تحياتي

كلمات من نور يقول...

اضحك الله سنك يا ماجد

انا عندي نفس مشكلتك بقى بس معكوسة

عندي أربعه من البنين وباستمتع جدا لما الاقي واح أو واحده يخبطوني بكلمة : داه مخلفش اللي مخلفش بنات ......سبحانك يارب يعني أنا مخلفتش خالص مالص أمال العيال دي منين بقى؟؟؟؟؟؟؟؟

واقولهم اهو الكبير بقى على سن جواز يتجوز بقى ويجيبلي بنوته يردوا مش زي لما تكون بنتك

يارب الهمني الصبر أقولهم أنا باحب بنات اخواتي و أخويا وبنقعد انا وهما االف لهم حوايت ونعمل حصص رسم وتلوين ووووووووووووووو يمصمصوا شفايفهم ويقولوا مش نفس الشيء

طيب بقى مع خالص احترامي ليكم

.....................

ربي يخليهم بنات وبنين مشكلين أو مش مشكلين سبحان الله حتعترضوا على مشيئة الخالق اليذ يهب من يشاء؟

Unknown يقول...

ربنا يباركلك فيهم وتفرح بيهم انا برده عندي بنت واحدة الحمد لله ومبسوط كده لدرجة اوقات كتير بقول بكفاية لكن برجع واقول كل اللي يجي من عند ربنا خير

مسلمة حرة يقول...

السلام عليكم ورحمة الله وبركاته
الحقيقة لم أتمالك نفسى من الضحك
لطالما مررت بهذا الإستجواب .. وتعرضت لنفس الشفقة .. فأنا أم البنات ..لدى ثلات زهرات جميلات رقيقات وصديقات .. لم أشعر يوما بأننى ينقصنى أى شىء لعدم وجود ذكر .. وأضطر كثيرا لشرح أن هذا يتنافى مع مبادىء ديننا الحنيف وأنه لا يصح لمسمل أو مسلمة أن يتحدث بهذا الشأن أبدا لأنه من ضعف الوازع الدينى .. أقول مالفرق ؟ إن إبنة صالحة خير ألف مرة من ذكر طالح .. المهم أن يبارك الله فيهن ويجعلهن من الصالحات
ربنا يبارك فى بناتك ياأبو البنات

ويبارك فى كل أولاد المسلمين والمسلمات
طبعا كلمة ولد تشمل الإناث والذكور

أشرف محيي الدين يقول...

أستاذ ماجد

صدقا هذه العقدة متأصلة في عالمنا العربي حتى بعد الإسلام وإنني أحييك وبشدة على أنك وأدتها من عقلك قبل ولادتها على الرغم من المؤثرات التي تحيط بك من كل جانب .

الله يخليلك البنات ويحميهم ويحفظهم من كل شر وسوء .

كل الود

الحسينى يقول...

بارك الله لك فى ذريتك وأصلحها لك أمين
أنا بحب البنات جداً وإن شاء الله أتمنى يكون أول أولادى بنت وجدتى رحمها الله كانت نفس عقلية جدتك ربنا يديها الصحة وكانت دايماً تقول لأخواتى البنات أن البنات ملهومش أى لازمة بس للحق كانت لما تقعد معاهم دايماً تقولهم أن البنات هما اللى بياخدوا بالهم من أهلهم وأنهم أحسن من الولاد :)
سلمت يداك

همسات وبحــ الحياه ــر يقول...

:(:(:(:(
انا كنت سايبه تعليق هنا

همسات وبحــ الحياه ــر يقول...

طب خييييييير
هرجع تانى اكتب تعليق ^_^
تحياتى

sal يقول...

اهو انت كدا تبقى صاحبى وصديقى ورفيقى كمان ....هههههه

تحياتى

منتحرة بخنجر الحرف يقول...

هههههههههههههههه كنت لسة بكلمها من يومين بتقولى مالك يا حبيبتى صوتك واطى ليه بقولها ما فيش يا تيتية تقولى بجدية كدة وانت عارف طريقتها بصى يا حبيبتى لما حد يسألك معاكى ايه تقولى شهد وانت موطية راسك و موطية صوتك دا يحقلك انما تقولى محمد بعلو صوتك و تحمدى ربنا انه رفع راسك بيه لسة هحاول اناقشها واغلس عليها كالعادة لقيتنى عمالة أدحك وقلتلها حاضر يا تيتا
منتظرة الجزء التانى

كلمات من نور يقول...

أنا عملت بوست

بحب التدوين

http://mamanooor.blogspot.com/2010/12/blog-post_12.html

Unknown يقول...

الموضوع جميل و أسلوب حضرتك في السرد ممتع للغايه و طبعاً كله رزق من ربنا مش عايزه أقول كلام تقليدي بس خلاص افتكر الناس مفروض يبقى عندها وعي كفايه بأن مفيش فرق بين بنت و ولد
على فكره أنا بعد ما دخلت مدونتك بالصدفه فوجئت بتعليقاتك في مدونتي الصغيره...أسعدتني جداً وآسفه لو كنت شفتها متأخر
تحياتي لك

همسات وبحــ الحياه ــر يقول...

اييييييه دا انت مبتخلفش ولاد ::(
امال مين اللى هيشل اسمك
لازم تشوف حل
بنتييييييين ياماجد مفيش فيهم ولد حتى ياخد باله منهم لما يكبروا :(:(
ربنا يرزقك بدسته اولاد يملوا عليك البيت ويفرحو فلبك
انا عارفه انك بتقول مش عايز ولاد من ورا قلبك
ههههههههههههههه

انا مبطلتش ضحك طول البوست
بحيييك بشده على رأيك وعقلك
انا بحب البنات جدااااااا عيلتنا اكترها بنات بحب العب معاهم مليش دعوة بالولاد خالص ههههه

واحلى حاجة حوارك مع جدتك هههههههه

للاسف لسه فيه ناس بالتفكير المتحجر دا كتيييير بلاقى رجاله بتطلق زوجاتها عشان خاطر ولد وبنت حاجاة غريبه
ضحكتنى جدا لما قولت
آسف يا تيتة.. عندك حق.. أنا خلاص قررت إني أجيب ولد.. اصبري عليّ شوية والأجازة الجاية هيكون معايا
الله المستعان
هما لو عارفين ان وراء كل رجل عظيم امرأه
محدش كان فتح بقه خالص وعلى رايك هى تيتة دي مش ست برضه
عارف يااستاذ ماجد هى مجرد تغيير فكر وان الناس تعرف ان المرأه لها مكانه زى الرجل
كنت بتكلم فى الموضوع دا مع صحبتى بتاع بنت وولد تربيه البنات احسن بكتير من تربيه الاولاد حتى هما كائنات رقيقه
ربنا يخليهم ليك وتشوفهم احسن بنات فى الدنيا دى كلها
مش احنا اخدنا امبارح الصحافه الصفراء بس ان انجليش ههه
وكمان كنتفى الجرنال بس ناس غريييبه
الاقهم بيقولولى روحى لسيد عبد المجيد اعملى معاه حوار الله مش سيد عبد المجيد دا اخوان ولا انا مش واخده بالى برضو ههههه
اللى استشفيته كدا والله اعلم
انهم بيحبوا ياخخدوا رأيهم لانه دايما فى الصميم ولانهم مبيخفوش فى الحق لومه لائف
لكن انهم ينشروا اخبارهم وكدا لا :(
يلا الله المستعان
تحياتى مرة تانية

شمس النهار يقول...

هو ده للأسف مجتمعنا الغريب

والغريب ان اكتر حد بيتكلم في الموضوع ده النساء

وتلاقي كلمة ماتجربي تاني يمكن يجي ولد
لما كنت بسمع الكلمه دي كان اللي بيقولها بيصعب عليا

نسيوا الرضا نسيوا الاستعداد النفسي
جعلوا الخلفه عاهه

الحمد لله بناتي قروا عيني ولم اشعر بهذه العاهه:)) ابدا

وياريت الناس تتعلم ان كل واحد يخليه في حاله

مدونه ما كفايه بقى يقول...

احييك اخى عى كلماتكلعلالكل يقرأها ويتعظ

البنات اكبر نعمه ربنا ينعم بيها علينا

كفايه ان اللى عنده بنات واحسن تربيتهن بيدخل بيهم الجنه


كفايه ان اول شهيده فى الاسلام كانت واحده مش واحد كفايه كفايه كفايه

لو قعدت اعدد مش هخلص

احييك مره تانيه انك من النوع الواعى المدرك نعمه ربنا عليه

ربنا يجعل بناتك ذريه صالحه يا رب ويكونوا سبب لدخوك الجنه


ملحوظه : احنا الحمد لله خمس بنات وانا الوسطى

تحياتى لك اخى

ودى واحترامى:)

عبد الرؤوف بن عبدالسلام (أبوهارون) يقول...

سلامي اليك
في جميع الدول و العربية خاصة نفس السوءل
ان المراة هي نصف المجتمع لو يفهمون
في تونس كان ماعندش بنت قالوا ....بنت باهيا....وكان ما عندش ولد....اه مسكين/ة/
رؤوف

الشاب الصح يقول...

طيب ادعيلى اتجوز الاول و بعد كده نتكلم فى الاولاد هههههههههه انا بهزر اخى ربنا يباركلك فيهم و يجعلهم امثال الخنساء و يجعلهم ذريه صالحه جزاك الله خيرا
تحياتى لك فى انتظار باقى الحديث

هبة فاروق يقول...

البنات سكر وشربات ربنا يخليك لهم
وتشوفهم احسن بنات فى الدنيا

Unknown يقول...

أم هريرة (lolocat):

وعليكم السلام ورحمة الله
طبعا أختي الكريمة.. أحمد الله دائما على نعمة الإنجاب.. فهي نعمة عظيمة تحتاج إلى الشكر ليل نهار..
هعرفك على تيتة، بس لما اقنعها الأول تعمل مدونة :)
أسعدني أن تكوني أول المعلقين.. أصلك سباقة دائما بالخير..
تحياتي أختي الكريمة.

Unknown يقول...

البنفسج الحزين:

أسعدني أن البوست أضحكك؛ فهذا هدفه الرئيسي.. رَسْم البسمة على وجوه إخواني وأخواتي..
جزاك الله خيرا على دعائك الرقيق لأسرتي..
"ويخاويهوملك".... برضه؟! :)
تحياتي أختي الكريمة.

Unknown يقول...

موناليزا:

جزاك الله خيرا على الدعاء..
وأشكر لك ثناءك..
قولي آمين... قولي بس آمين..
ربنا يرزقك الذرية الصالحة ويسعد قلبك بكلمة ماما..
تحياتي أختي الكريمة.
* * * * *
آسف بشأن التأخير في الرد على الاستفسار، لكن ملحوقة:
سأرسل الرد الآن على آخر تدوينة في مدونة أمة الله..

Unknown يقول...

خواطر شابة:

"تعرف تدوينتك اليوم أثارت قي شجون كثيرة"..
طبعا أختي الكريمة لم أقصد هذا.. بل كان الغرض من التدوينة خلاف ذلك تماما.. لكن أدرك تماما ما تعانيه؛ فللأسف كثير من أخواتنا الكريمات يعانين من المحيطين بهن بتفضيل الذكور عليهن بدون سبب إلا أنهم ذكور.. مهما كن مجتهدات أو مفيدات أكثر من الذكور..
عامة أختي الكريمة أرى من متابعتي لمدونتك أنك شخصية واثقة من نفسها.. وأعتقد أنكِ تجاوزت مثل هذه الترهات.. والحمد لله أنه لم يبقى منها إلا مجرد شجون..
دمتِ سالمة مع تحياتي.

Unknown يقول...

قطرة وفا:

"الاطفال كلهم نعمة من ربنا".. لا شك في ذلك.. فقط أنا أحب نعمة أكثر من نعمة أخرى :)
إن شاء الله لن يطول انتظارك للجزء الثاني.
تحياتي أختي الكريمة.

Unknown يقول...

ستيتة حسب الله الحمش:

أعجبني جدا تحليلك، أولا لأنه صح جدا، وثانيا لأنه أكمل ما نقص من الموضوع؛ لأنك عارفة طبعا الهدف الرئيسي منه، فلم أحب أن أثقله بتحليلات حول القضية تضيع الغرض الأساسي.. وثالثا لأنك ريحتيني من كتابة موضوع جاد عن القضية... في الوقت الحالي على الأقل.
سعيد قوي بالعبارات دي:
"ربنا يخلي البنات
اللي عبارة عن ورد بلون وريحة في البيت
واللي بيخدموا الأم والأب في الكبر حتى لو مع عشرين ولد
واللي صدقا وحقا حبايب ابوهم"

وصفتي بيها علاقتي ببناتي باختصار وتركيز.
تحياتي وتقديري أختي الكريمة.
* * * * *
أشكرك جزيلا يا دكتورة على سرعة تلبية الدعوة.

Unknown يقول...

كلمات من نور:

"أضحك الله سنك يا ماجد"... آمين ولك بمثله إن شاء الله..
أضحكني تعليقك جدا:
"داه مخلفش اللي مخلفش بنات ......سبحانك يارب يعني أنا مخلفتش خالص مالص أمال.. العيال دي منين بقى؟؟؟؟؟؟؟؟"
والله الناس زي مانتي عارفة ما يعجبهاش العجب..!
ربنا يخليلك أولادك وتفرحي قريبا بأول ذريتهم..
تحياتي أختي الكريمة.
* * * * *
أشكرك جزيلا على تلبية الدعوة.

Unknown يقول...

واحد من الناس:

أنا برضه بقول كفاية البنتين... بس من ورا تيتة :)
ربنا ينبت ابنتك نباتا حسنا ... (كم تاء في ذلك؟ :)
تحياتي أخي الكريم.
* * * * *
أشكرك جزيلا على تلبية الدعوة.

Unknown يقول...

أنا حرة:

وعليكم السلام ورحمة الله وبركاته
سعيد بأن البوست أضحكك.. فقد حقق هدفه..
لطالما مررنا جميعا بالاستجواب...!
ربنا يسعدك بزهراتك الثلاث...
على فكرة علشان ترضي الناس، إيه رأيك تبدلي مع أختنا (كلمات من نور).. ويبقى كل واحدة منكما عندها تشكيلة :)
"إن إبنة صالحة خير ألف مرة من ذكر طالح"
هي دي الخلاصة..
أشكرك أختي الكريمة على دعائك الطيب لبناتي..
دمتِ سالمة.

Unknown يقول...

أشرف محيي الدين:

أخي أشرف.. سعيد بتعليقك.. وبالمناسبة همتك معانا واكتب لنا قصة من قصصك الجميلة تطرح فيها الموضوع بطريقتك المشوقة.. مش فكرة برضه؟
تحياتي أخي الكريم.

Unknown يقول...

الحسينى:

أشكرك جزيلا أخي الكريم على دعائك الطيب.. وأقول وراءك: آمين.
ربنا يرزقك ما تتمنى وتكون ذرية صالحة.. ورحمة الله على جدتك..
الحقيقة جدتي لا ترفض البنات رفضا باتا... لكن أهم ما يشغلها أن ينجب كل منا ذكرا واحدا على الأقل (يرفع بيه راسه بين الناس :) )، وبعد ذلك فلينجب ما يشاء من الإناث!!!!
تحياتي.. ونورت المدونة أخي الكريم.

Unknown يقول...

همسات وبحــ الحياه ــر:

ولا يهمك بالنسبة للتعليق اللي راح.. الحركات دي بيعملها بلوجر معانا كتير ^_^
للأسف هخلف ظنك :) أنا فعلا مش عاوز ولاد من قلبي (هتعرفي ليه البوست القادم)
"انا مبطلتش ضحك طول البوست".. وهذا أسعدني بصدق أختي الكريمة.. لأنه هدفي الأساسي من الموضوع..
أشكرك على رأيك ..
وبالنسبة لحواري مع تيتة... هتضحكي أكثر لما تقرئي تعليق أختي نسرين في تعليقات نفس الموضوع ده!! (اسمها: منتحرة بخنجر الحرف)
طبعا مستحيل تيتة تغير رأيها، وأنا باعذرها.. للأسباب التي أوردتها الدكتورة ستيتة..
* * * * *
"مش احنا اخدنا امبارح الصحافه الصفراء"... طبعا إنتي كان عندك معلومات غزيرة في الموضوع من المدونة :)
كويس إن أهل الجرنال بتاعك عارفين قيمتهم... خليكي معاهم (رغم غرابتهم) لغاية ما تحصلي على كارنيه العضوية.. :)
تحياتي أختي الكريمة..

Unknown يقول...

sal :

أضحكني تعليقك جدا..
أصلي كنت حاسس إنك فاضل تقولي: تلتزم بالقوانين.. يا سلام.. تبقى حبيبي .. ما تلتزمش .. أعصرك تنزل مدونين صغيرين.. هههههههه
تحياتي أخي الكريم.

Unknown يقول...

منتحرة بخنجر الحرف:

يا ريت يا نسرين يقرؤوا تعليقك علشان يصدقوا اللي بتعمله تيتة هههههههههه

Unknown يقول...

شيرين سامي:

أشكرك على رأيك في الموضوع..
وطبعا الوعي لدى الناس اختلف كثيرا.. وإن كان البعض ما زال بداخله بعضا من هذه النعرة الجاهلية.. حتى لو لم يفضي بها!!
تحياتي أختي الكريمة.. ولا داعي للاعتذار.. كفاية تشريفك لي.

Unknown يقول...

شمس النهار:

"وتلاقي كلمة ماتجربي تاني يمكن يجي ولد" .. بتحصل كتير فعلا.. بس أنا بريح نفسي زي ما شفتي مع تيتة، بقول: حاضر.. المرة الجاية هدوس على الزرار اللي بيجيب ولاد!!!!
ربنا يخليلك بناتك وينبتهن نباتا حسنا.
تحياتي أختي الكريمة.

Unknown يقول...

مدونه ما كفايه بقى:

أشكرك جزيلا على رأيك في الموضوع..
وبالنسبة لقولك: "كفايه ان اللى عنده بنات واحسن تربيتهن بيدخل بيهم الجنه".. والله لا أنسى أبدا هذا الوعد من النبي -صلى الله عليه وسلم-..
جزاك الله خيرا على دعائك الطيب لي ولبناتي
ربنا يخليكي أنت وأخواتك لوالديك، وتكونوا جميعا سويا في الجنة بإذن الله.
تحياتي أختي الكريمة.

Unknown يقول...

amiralcafe :

وعليكم السلام أخي رؤوف..
أسعدتني زيارتك وتعليقك..
طبعا هناك الكثير من الأفكار والمعتقدات تشترك فيها الشعوب العربية..
تحياتي أخي الكريم وشاكر لك كرمك في الزيارة رغم تقصيري.

Unknown يقول...

الشاب الصح:

روح يا شيخ.. إلهي تغمض عينك وتفتحها تلاقي نفسك مخلف.. قصدي متجوز وتفرحلك يومين وبعدين تخلف :)
أشكرك جزيلا على دعائك الطيب..
تحياتي أخي الكريم مع وعد والله بزيارة قريبة جدا.

Unknown يقول...

هبة فاروق:

سعدت جدا بمرورك أختي هبة..
أشكرك على الدعاء لبناتي.. آمين يا رب.
تحياتي أختي الكريمة.

همسات وبحــ الحياه ــر يقول...

ههههههههههه
بالفعل انا قريت التعليق قبل مااعلق انا عارفه انها اختك فقريت التعليق وفضلت اضحك
ربنا يحميلكم تيتا ^_*
تانى حاجة علفكرة انا فى تعليقى فى الاول مقصدتش انى اقولك فكر فى خلفه الولاد دا انا كنت بكمل الحوار اللى دايما بيدور هههههه
اييييييه دا انت مبتخلفش ولاد ::(
امال مين اللى هيشل اسمك
لازم تشوف حل
بنتييييييين ياماجد مفيش فيهم ولد حتى ياخد باله منهم لما يكبروا :(:(
ربنا يرزقك بدسته اولاد يملوا عليك البيت ويفرحو فلبك
انا عارفه انك بتقول مش عايز ولاد من ورا قلبك

لكن انا بحب جدا الرضا بقضاء الله
ربنا قال يَهَبُ لِمَنْ يَشَاء إِنَاثًا وَيَهَبُ لِمَن يَشَاء الذُّكُورَ (49) أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَن يَشَاء عَقِيمًا إِنَّهُ عَلِيمٌ قَدِيرٌ
صدق الله العظيم
فالواحد يحمد ربنا انه على الاقل جاب اولاد نسبهم عند الله ذريه صالحه
فى ناس بتعمل المستحيل عشان بس يكون عندها طفل
انا بتخيل منظر تيتا وهى بتكلمك وانت معندكش اولاد بالمرة بتهيألى كانت قالتلك اتجوز تانى ههههه

انا نزلت حلقه جديدة عايزة رأيك فيها

موناليزا يقول...

Invalid blog URL
ده اللى طلعلى لما عملت الخطوات:(

واحد من الناس يقول...

كل اللي يجيبه ربنا كويس

بمنطق الرضا طبعا مش بمنطق الحسره وتمثيل الرضا

سبحان الله

أنا باستغرب من اللي زعلان إن خلفته كلها بنات

يا أخي بص للي لم ينعم الله عليه بالإنجاب أيضا

والا بص للي عندهم ولاد مطلعيني عنيهم والا رامينهم في دار مسنين

ربنا يباركلك في بناتك

ويزيدك عقلا ورضا

تحياتي لك

Unknown يقول...

حبيب قلبي
ماجد
اقول لك الحقيقة اني لما شوفت اسم البوست قبل ما اشوف الموضوع
انا بجد فكرت في موضوع تاني خالص
فكرت انك بتحب البنات البنات مش البنات بناتك
ههههههههه
سمحني
لكن بجد احييك علي الموضوع وانا زيك بس لما ربنا رزقنى بولد لقيت زوجتي فرحت جدا جدا بية لان كان عندنا بنتين قبلة
ولما زوجتي الثانية جابت ولد برضك فرحت جدا هي كمان
يعني ستك كان عندها حق هما بيحبوا الاولاد اكثر مننا
يمكن زى ما الدكتورة ستيتة شرحت ووضحت ويمكن عشان اشياء اخرى
المهم تحياتى لك

Unknown يقول...

السلام عليكم ورحمة الله وبركاته
هذا الفكر الضبابى مع الأسف مازال مترسخاً فى الكثير من العقول....
وأحييك على تناولك الرائع والشيق
وتقديم القضية فى قالب طريف يقرب الفكرة
إلى المتلقى بدون عناء...
تقديرى واحترامى
وبارك الله فيك وأعزك

أشبال أون لاين يقول...

هههههههههههههه

موضوع جميل جداً

تحياتي

Unknown يقول...

همسات وبحــ الحياه ــر:

دلوقتي فهمت.. ^_*
إن شاء الله قريبا أقرأ الحلقة الجديدة..
تحياتي.

Unknown يقول...

موناليزا:

آسف لم أر إخبارك بالمشكلة إلا الآن... سأرجع للموقع وأرد عليك بأسرع

وقت.. لأني أذكر أن هذه المشكلة واجهتني أول مرة.

Unknown يقول...

واحد من الناس:

صدقتَ أخي الكريم..
جزاك الله خيرا على دعائك الطيب..
تحياتي.

Unknown يقول...

ali younes :

نورت أخي علي.. مشتاقين إليك..
أولا: الله يسامحك ههههههههه
ثانيا: قصتك بالفعل تؤكد الفكرة، وأرى أن تحليل دكتورة ستيتة فسر

الموضوع جيدا..
تحياتي أخي الكريم.

Unknown يقول...

محمد الجرايحى:

وعليكم السلام ورحمة الله وبركاته..
أشكرك جزيلا على ثنائك..
تحياتي وتقديرى أخي الكريم

Unknown يقول...

أشبال أون لاين:

أسعدني أن البوست أسعدك.. وأشكرك على إطرائك..
أعتقد أنك عند قراءتك لهذا الرد سيكون الجزء الثاني قد نشر... فإلى هناك.
تحياتي أخي الكريم.

Dr/ walaa salah يقول...

ربنا يخليلك بناتك يا ماجد وتفرح بيهم يارب

والله مفيش احلى من البنات دول بينوروا اي بيت


ربنا يكرمك فيهم

Unknown يقول...

Dr/ walaa salah :

جزاك الله خيرا على الدعاء الجميل..
منورة المدونة دايما.

نسرين شرباتي "أم سما" يقول...

لسا بناتي عمرهم شهرين

وسمعت الحوار ده يجي اكثر من 100 مرة

أومال لو مجبتهمش بعد 7 سنين

كانت الناس حتقول إيـــــــــــــــه

Positive Point يقول...

^__^ قلت كل ما يمكن ان يقال

اللهم احفظهم وأن يحيوا حياة هنيئة بنعم الله ورضاه وحماه بين كفى والديهما

تلقى ضوء أخضر يعم أرجاء الحدث حول شعاع أحمر .. لأساليب التنشئة السليمة للأبناء

جزاك الله كل خير

ظلالي البيضاء يقول...

ههههه
وبتقوللي إن حكاياتي طريفة .. أهو الحال من بعضه ..
ربنا يحفظ بناتك وعائلتك كلهم .. وطبعاً أهم شيء تيتة .. ههههه
مع تحياتي لك أستاذ ماجد

hana يقول...

هم بدهم ذكور عشان اسم العائلة الكبير اللي عمل انجازات وإنتصارات و وضع بكتب التاريخ يستمر عشان يتباهوا احفاد احفادهم بأسمهم لما يشوفوا بكتب التاريخ بالمدرسة :q
طبعا بتريق (بتخوت)
nice post :) thanx for naysan for sharing ur blog :)

Unknown يقول...

Hana

على فكرة... فعلا أنا باتريق برضه بنفس الكلام...!!!
ومع ذلك كم من بنات رفعن رؤوس آبائهن عاليا وخلدوا أسماءهم...
وكم من ذكور تمنى آباؤهم لو لم يأتوا إلى الدنيا!!!!

تحياتي أختي الكريمة.. ومرحبا بك في زيارات تالية.